Perché scrivo in zeneize? Ma scusae
l’è come domandà a’n parguletto
perché o s’attacca a-a tetta de so moae!
Va ben no son ciù un pargolo,l’ammetto,
ma pe rende con tutta fedeltae
‘na battua, un n’ immagine o un concetto
con a sintesi viva da realtae
ghe veu a forsa e o colore do dialetto
So che quest’uso o no l’è ciu moderno
perché no fa distinto,no fa fin
ma son segùo che anche o Padreterno
(almeno in casa quando o l’e in borgheize)
forse co-i santi o ghe parlià latin
ma in famiggia o ghe parla in bon zeneize.
Aldo Acquarone
